పాలమూరులో మెడికల్ కాలేజీ

హైదరాబాద్, నమస్తే తెలంగాణ : మహబూబ్‌నగర్‌లో కొత్తగా మెడికల్ కాలేజీ ఏర్పాటు కానుంది. ఉమ్మడి రాష్ట్రంలో అత్యంత నిరాదరణకు గురై, వెనుకబడిన పాలమూరు జిల్లాను అభివృద్ధి బాటలో నడిపేందుకు ముఖ్యమంత్రి కే చంద్రశేఖర్‌రావు తీసుకుంటున్న పలుచర్యల్లో భాగంగా రాష్ట్ర ప్రభుత్వం ఈ నిర్ణయం తీసుకుంది. జిల్లా వెనుకబాటుతనంతోపాటు ఇతర అంశాలను పరిగణనలోకి తీసుకున్న ప్రభుత్వం వైద్యకళాశాల ఏర్పాటుకు సుముఖత వ్యక్తంచేసింది.

మహబూబ్‌నగర్ జిల్లాలో మెడికల్ కాలేజీ ఏర్పాటుకు సంబంధించిన ప్రతిపాదనలను ఆదివారం డైరెక్టరేట్ ఆఫ్ మెడికల్ ఎడ్యుకేషన్ (డీఎంఈ) అధికారులు ఆన్‌లైన్‌లో సాఫ్ట్‌కాపీని మెడికల్ కౌన్సిల్ ఆఫ్ ఇండియా (ఎంసీఐ)కి పంపించారు. కొత్త మెడికల్ కాలేజీల ఏర్పాటుకు సంబంధించి ఆగస్టు 31 చివరితేదీ కావడంతో డీఎంఈ అధికారులు సోమవారం ఉదయం ఢిల్లీ బయలుదేరి వెళ్తున్నారు. ప్రస్తుతం రాష్ట్రంలో ఐదు మెడికల్ కాలేజీలున్నాయి. రాష్ట్రంలోని 10 జిల్లాల్లో మెడికల్ కాలేజీలు ఉండాలనే తలంపుతో ప్రభుత్వం కొత్త వైద్య కళాశాలల ఏర్పాటుకు సిద్ధమైంది. నల్లగొండ, కరీంనగర్, మెదక్, ఖమ్మం, రంగారెడ్డి, మహబూబ్‌నగర్ జిల్లాల్లో ప్రభుత్వ కాలేజీలు లేవు. మొత్తానికి మహబూబ్‌నగర్ జిల్లాకు చెందిన వైద్య, ఆరోగ్య శాఖ మంత్రి లకా్ష్మరెడ్డి కృషి త్వరలో ఫలించనుంది.

అన్ని అనుమతులతో పకడ్బందీగా: మహబూబ్‌నగర్ జిల్లాల్లో ఏర్పాటుచేసే మెడికల్ కాలేజీకి సంబంధించి అన్ని అనుమతులను ఇప్పటికే పొందారు. ప్రభుత్వ మెడికల్ కాలేజీకి ఏర్పాటుకు జిల్లా కలెక్టర్ స్థలం కేటాయించాలి. ఈ మేరకు మహబూబ్‌నగర్ జిల్లా కలెక్టర్ 23 ఎకరాలను కేటాయిస్తూ ఇప్పటికే ఉత్తర్వులు జారీచేశారు. అదే సమయంలో ప్రిన్సిపల్ సెక్రటరీ ఎసెన్షియాలిటీ సర్టిఫికెట్ కూడా ఇచ్చారు. దీంతో బ్లడ్‌బ్యాంక్ ఏర్పాటుకు డ్రగ్‌కంట్రోల్ అథారిటీ సర్టిఫికెట్లు కూడా వెంటనే వచ్చాయి. వీటితో పాటు ఇతర అన్ని సర్టిపికెట్ల సాఫ్ట్‌కాపీలను ఆన్‌లైన్‌లో ఎంసీఐకి పంపారు.

హార్డ్‌కాపీలను సోమవారం అందించనున్నారు. ఎంతో వెనుకబాటుకు గురైన మహబూబ్‌నగర్ జిల్లాలో మెడికల్ కాలేజీని ఏర్పాటు చేయాలని ప్రభుత్వం నిర్ణయించిన నేపథ్యంలో జిల్లాకు ఎంతో ప్రయోజనం చేకూరనుంది. ప్రస్తుతం మహబూబ్‌నగర్ జిల్లా దవాఖానలో 350 పడకల సామర్థ్యం ఉంది. మెడికల్ కాలేజీ ఏర్పాటుకు ఈ సామర్థ్యం సరిపోతుంది. కొత్త మెడికల్ కాలేజీ ఏర్పాటుకు అనుమతి లభిస్తే ఈ దవాఖాన సామర్థ్యం వెయ్యిపడకలకు పెరుగుతుంది. అదే సమయంలో స్పెషాలిటీ సేవలు, పీజీ సీట్లు కూడా అందుబాటులోకి వస్తాయి. 2016-17 సంవత్సరంలో ఈ కాలేజీని ప్రారంభించాలనే లక్ష్యంతో అధికారులు పరుగులు పెడుతున్న నేపథ్యంలోనే త్వరలోనే ఎంసీఐ నుంచి తనిఖీ బృందం వచ్చి పరిశీలించనుంది.

రాష్ట్రంలో 34 పట్టణాల్లో ఆవాస్ యోజన

న్యూఢిల్లీ, నమస్తే తెలంగాణ:దేశంలోని పట్టణప్రాంతాల్లో ప్రతి కుటుంబానికీ సొంత ఇల్లు ఉండాలన్న లక్ష్యంతో కేంద్ర ప్రభుత్వం ప్రవేశపెట్టిన ప్రధానమంత్రి ఆవాస్ యోజన (అందరికీ ఇండ్లు) పథకానికి తొలి దశలో తెలంగాణ సహా 9 రాష్ర్టాలను ఎంపికచేశారు. ఈ రాష్ర్టాల్లోని 305 నగరాలు, పట్టణాల్లో ఇండ్లు లేని నిరుపేదలకు పక్కా ఇండ్లు నిర్మించి ఇస్తారు. మన రాష్ట్రంలోని 34 నగరాలు, పట్టణాల్లో పేదలకు ఇండ్లు కట్టివ్వనున్నారు. కేంద్ర, రాష్ట్రాలు సంయుక్తంగా అమలుచేసే ఈ పథకానికి కార్యాచరణ ప్రణాళికను సిద్ధం చేసినట్లు గృహనిర్మాణం, పట్టణ పేదరిక నిర్మూలన (హెచ్‌యూపీఏ) శాఖ అధికారులు ఆదివారం ప్రకటించారు. పథకం కింద కేంద్రం ఒక్కో ఇంటికి రూ.1లక్ష నుంచి రూ.2.30 లక్షల వరకు ఆర్థిక సాయం అందజేస్తుంది. తెలంగాణలో ఇండ్లు లేని నిరుపేదలకు రెండు పడక గదుల ఇండ్లను నిర్మించడానికి సీఎం కేసీఆర్ ఇప్పటికే కసరత్తుప్రారంభించిన నేపథ్యంలో కేంద్ర పథకం కూడా రాష్ట్ర పథకంతో కలిసి అమలు కానుంది. రాష్ట్రం నుంచి ఇప్పటికే రెండు స్మార్ట్ సిటీలు, 11 అమృత్ నగరాలుగా ఎంపికైన విషయం తెలిసిందే. అందరికీ ఇండ్లు పథకం కూడా వీటితో పాటే అమలు కానుంది. హైదరాబాద్, వరంగల్ నగరాల్లో ఏకకాలంలో స్మార్ట్ సిటీ, అమృత్, అందరికీ ఇండ్లు పథకాలు అమలవుతాయి. మిగిలిన ఎనిమిది అమృత్ నగరాల్లో ఆ పథకంతోపాటు అందరికీ ఇండ్లు పథకం అమలవుతుంది. సిద్దిపేట విషయంలో కేంద్రం నుంచి ఇంకా అమృత్ ప్రకటన అధికారికంగా వెలువడనందున ప్రస్తుతానికి రాష్ట్రంలో పది అమృత్ నగరాలు మాత్రమే మంజూరైనట్లు భావించాల్సి ఉంటుంది. హైదరాబాద్, వరంగల్‌లతోపాటు ఆదిలాబాద్, కరీంనగర్, ఖమ్మం, మిర్యాలగూడ, నల్లగొండ, మహబూబాబాద్, నిజామాబాద్, సూర్యాపేటలు అమృత్ నగరాలుగా ఎంపికయ్యాయి. 

కేంద్రంతో 15 రాష్ర్టాల ఒప్పందం

అందరికీ ఇండ్ల పథకాన్ని అమలుచేసేందుకు కేంద్రంతో 15 రాష్ర్టాలు ఒప్పందం కుదుర్చుకున్నాయి. కేంద్రం ప్రతిపాదించిన ఆరు సంస్కరణలను అమలుచేసేందుకు ఈ రాష్ర్టాలు అంగీకరించాయి. వీటిలో మొదటగా 9 రాష్ర్టాల్లో పథకం అమలుకోసం పట్టణాలు, నగరాలను ఎంపికచేశారు. తెలంగాణ (34), ఒడిషా (42), రాజస్థాన్ (40), మధ్యప్రదేశ్ (74), కేరళ (15), జార్ఖండ్ (15), జమ్ముకశ్మీర్ (19), గుజరాత్ (30), ఛత్తీస్‌గఢ్ (36)లో మొదటిదశలో ఇండ్లు నిర్మిస్తారు. కేంద్రంతో అవగాహనా ఒప్పందం కుదుర్చుకున్న మిగతా రాష్ర్టాల్లో ఆంధ్రప్రదేశ్, బీహార్, మణిపూర్, మిజోరం, నాగాలాండ్, ఉత్తరాఖండ్ ఉన్నాయి. 

ఆరేండ్లలో రూ.2 లక్షల కోట్లతో రెండు కోట్ల ఇండ్లు

దేశానికి స్వాతంత్య్రం వచ్చి 2022వ సంవత్సరం నాటికి 75 ఏండ్లు పూర్తవుతున్న నేపథ్యంలో అప్పటికల్లా దేశంలోని పట్టణ పేదలకు రెండు కోట్ల ఇండ్లను నిర్మించి ఇవ్వాలని కేంద్ర పట్టణాభివృద్ధిశాఖ నిర్ణయించింది. ఇందుకోసం రూ.2 లక్షల కోట్లు ఖర్చుచేయనున్నారు. అయితే, కేంద్రం నిర్దేశించిన ఆరు సంస్కరణలను అమలుచేస్తేనే ఇండ్ల నిర్మాణానికి నిధులు ఇస్తుంది. పథకం కింద ఎంపికైన పట్టణాల్లో నివాస ప్రాంతాలకు మాస్టర్ ప్లాన్ రూపొందించేటప్పుడు ఏ విధమైన సాగుభూములు లేకపోతే వెంటనే అమలు చేయడం, పథకం అమలుకు స్పష్టమైన ప్రణాళికను రూపొందించడం, ఇండ్ల నిర్మాణానికి అన్ని రకాల అనుమతులను సింగిల్ విండో విధానంతో సత్వరం మంజూరు చేయడం, ఆర్థికంగా బలహీనవర్గాలు, తక్కువ ఆదాయ వర్గాలకు ఇండ్లను నిర్మించడంలో అనుమతులకు ప్రాధాన్యం ఇవ్వడం, అవసరమైతే అద్దె చట్టాలకు కేంద్ర పట్టణాభివృద్ధి మంత్రిత్వశాఖ ఇప్పటికే సూచించిన విధంగా సవరణలు చేయడం, మురికివాడల అభివృద్ధి, తక్కువ ఖర్చుతో నిర్మించే ఇండ్ల విషయంలో అవసరాన్ని బట్టి నిర్మాణ విస్తీర్ణాన్ని పెంచడం అనే నిబంధనలను కేంద్రం విధించింది.

తెలంగాణలో పథకం అమలయ్యే పట్టణాలు:

ఆదిలాబాద్, నిర్మల్, నిజామాబాద్, బోధన్, ఆర్మూర్, కరీంనగర్, జమ్మికుంట, మెట్‌పల్లి, హుజూరాబాద్, హుస్నాబాద్, సిరిసిల్ల, వరంగల్, మహబూబాబాద్, జనగాం, ఖమ్మం, పాల్వంచ, నల్లగొండ, భువనగిరి, మిర్యాలగూడ, సూర్యాపేట, మెదక్, జహీరాబాద్, సిద్దిపేట, వికారాబాద్, దుబ్బాక, గజ్వేల్, సంగారెడ్డి, హైదరాబాద్, మహబూబ్‌నగర్, నాగర్‌కర్నూల్, వనపర్తి, షాద్‌నగర్, అచ్చంపేట, కొల్లాపూర్.

AUTHOR :- BELLAPURI SAIKUMAR

టీఎస్‌పీఎస్సీ గ్రూప్స్ పరీక్షల సిలబస్‌ విడుదల

హైదరాబాద్: గ్రూప్స్ పరీక్షల కోసం ప్రిపేర్ అయ్యే అభ్యర్థుల కోసం టీఎస్‌పీఎస్సీ సిలబస్‌ను విడుదల చేసింది. 90 మంది అధ్యాపకులు నెలపాటు శ్రమించి సిలబస్ తయారు చేశారని సిలబస్ విడుదల సందర్భంగా ప్రొ.ఘంటా చక్రపాణి తెలిపారు. జులై 27న ప్రభుత్వం స్కీంను ఆమోదించిందిని వెల్లడించారు. గ్రూప్స్ 1, 2, 3, 4తో పాటు గెజిటెడ్, నాన్ గెజిటెడ్ పోస్టుల కోసం సిలబస్ తయారు చేసినం. సిలబస్ తక్షణం వెబ్‌సైట్‌లో అందుబాటులో ఉంటుందని పేర్కొన్నారు.

నోటిఫికేషన్ వచ్చే లోపే అభ్యర్థులు ప్రిపేర్ కావోచ్చని ఆయన సూచించారు. సిలబస్ రూపొందించిన మేధావులకు, ప్రొఫేసర్లకు ధన్యవాదాలు. సిలబస్ కమిటీలో ఉన్న 32 మంది సభ్యులకు టీఎస్‌పీఎస్సీ తరపున కృతజ్ఞతలు తెలిపారు. సిలబస్‌లో తెలంగాణ చరిత్ర పొందుపర్చామన్నారు.

AUTHOR ;- BELLAPURI SAIKUMAR